Halalliqtin Hayat Hararetliktur !

Halalliq noqul yémekke teqqaslan'ghan söz emes. U adem rohining yeni et bilen qan arqiliq yürek – méngini heriketlendürüp turidighan janning tiriklikidur. Barche yaxshiliqlarning, xeyrlik ishlarning béshi halalliqtur, dések xatalashqan bolmaymiz. Halalliqning özi yaxshiliqqa toyun'ghandur : yaxshiliq,beriket, xatirjemlik, asayishliq, tinchliq, xushhalliq... Ibret közi bilen baqsingiz qiliqi halal insanning dili pak, niyiti durust, mengghan yoli toghra, insaniy abroy-inawiti yuqiridur, shunga«halal bolsang menggü yashaysen» (yaxshi nam menggü yadlinidu)! aghzigha küchi yetmeydighan (yuqiri töshüki bilen töwen töshükining perqi yoq ), boyni emgekke tetür tolghinidighan ( horun, emgekni söymeydighan) memedanlarning ( oruq uyning poqi chong, yarimasning gépi chong ,dep terplinidighanlar) chala ademlikini hayatning herbir qedemliri körsitip turuptu. Halal loqma gélingizge turup qalmaydu (meyli gösh we meyli söz), meydingizni échishturmaydu, uyqungizni qachurmaydu. Etrapimizgha inchikirek nezer tashlap közitidighan bolsaq, perzentlirige:
Qara turqunggha, nan yémeslerge oxshap qalghiningni, tüzükrek birnéme yégin, tutqan yolingni atanggha berme, geptin yanma, sanga nan bérip béqiwatimen… dégendek tenbihlerni béridighanlarni köp uchritimiz. Shundaq qingghir-qiysiq telim-terbiyede kökligen perzent halal adem bolarmu?
Riqabette reqibini héchbir hiyle-mikir ishletmey yenggen ademlerge bérilidighan eng aliy mukapat-teqdirname «merd ezimet» dégendin ibaret. Shundaq merdu-merdanilerning ara-nomusi, ghururi del shu «halalliq» terbiyisidin yétilgendur. Hazirqi künde etrapimizgha yene shundaq inchke nezer salidighan bolsaq, olturup tilishidighanlar, til éghir kelse chachrap turup birini bir toplar xish-tash qilip yenchiwétidighanlar, pichaqlap jénigha zamin bolidighanlar yaki birawni nakah qiliwétidighanlar uchrap turidu(buni arqidin kélip dümbige tigh uridighan namerdler, deymiz , bundaqlar halal telim-terbiyening xususidin emes) !